本文重點
嚟緊周日係「虎年」大年初一，稻香（00573）CEO梁耀進率先同太子拜個早年。佢仲同太子講，今年會維持過往「派利是」的傳統，年初一去稻香飲茶嘅茶客，每人都會收到十蚊利是，派完即止；仲話十蚊雖然唔算大銀碼，但最緊要「意頭好」。
太子知道，有不少商場連鎖店為吸引客人，都會趁新春派現金券，但直接送現金就好少見。梁耀進講，年初一「派利是」畀茶客嘅傳統已經維持咗九年，舊年稻香喺年初一就派咗100萬元，今年就「加碼」至130萬元，希望茶客到稻香飲茶可以皆大歡喜，又希望年初一旺丁又旺財。
員工分1500萬花紅
今年稻香員工亦喜洋洋，因為公司今年總共派1,500萬元花紅。
至於未來嘅發展大計，梁耀進預計，今年嘅食肆市道會轉好，不過，由於預期通脹重臨，成本上漲將令經營仍面對挑戰。佢仲話，現時公司在本港中餐市場嘅市佔率約6%，期望五年內可以升至一成。