股市尋底，需要一個過程，若然以恒指現水平計，向下尚有半成跌幅，阿莊並唔感到意外，事實係投資者並非「先知」，好難話一定要等到最低點先入市，若有心頭好，分注入市係較可行嘅做法。
個股方面，昨日輪到中油香港（00135）被洗倉，股價挫7.4%至8.58元收市，成交達到5.88億元。公司管理層上周才跟機構投資者會面，沒想到之後股價可以走晒樣，唔少喺10元樓上跟進嘅炒家，見勢色唔對，昨日亦紛紛忍痛止蝕，故見沽壓沉重。去年十二月，該股曾按每股8.27元先舊後新配股，若然短線守住呢個位反彈，高位接貨但尚未離場者，宜把握「逃生」機會。
昨日阿莊話上實（00363）已屆吸納水平，昨日見其股價一度失守33元，遂入場以平均價32.55元買入10,000股。由於有消息指銀行向內地房企Call loan，內房股氣氛欠佳，轉型大搞房地產嘅上實短線或尚有沽壓，但阿莊相信其遠景依然秀麗，會留意情況再考慮加注。
資金流入防守股份
避險資金繼續流入防守性股份，港鐵（00066）逆市升2.95%，收報26.2元；雨潤食品（01068）升2.8%，報21.55元；港燈（00006）及煤氣（00003）分別升1%及2.59%。
餐飲股大家樂（00341）股價回落至接近50日線16.5元水平亦現承接，昨日反彈上17元樓上，收報17.06元，升2.28%。大家樂截至去年九月底止中期業績，營業額創新高，達23.9億元，並連續六年取得盈利增長，半年純利為2.2億元。此外，公司喺華南地區亦已開設62間「大家樂」，成功構建一個具規模嘅業務台階，而「Manchu WOK」業績亦取得明顯改善。
大家樂喺廣州及香港嘅中央食品加工物流中心將於今年及明年投產，屆時進一步提升產能及營運效益，盈利前景有保障。業務四平八穩，手持淨現金逾8億元，無借貸，相信股價可經得起風浪。