阿莊就認為，歐洲嘅問題一直存在，唔係呢一刻先至出現，只係淡友做嘢嘅藉口。近期股市基本上跟住美匯表現走，撇除呢項因素，唔見得港股基調有太大變化。上周阿莊表示，恒指反彈喺20,600點水平有阻力，指數會喺19,500至20,500點水平上落，目前為止呢個預測波幅區大致管用。喺19,000點水平，可以留意分段中長線吸納實力股嘅機會。

放大圖片	放大圖片	放大圖片

蒙牛有買貴冇買錯

上周阿莊增持咗蒙牛（02319），如今睇嚟真係有點心急，但呢隻股有買貴冇買錯，將會繼續持有。

反而，港務股表現令人失望，手持嘅天津港（03382）及廈門港務（03378）都唔見了一截，但今年呢類股嘅經營環境應該勝於去年，所以決定繼續留守，惟有暫時做「鴕鳥」，當睇佢唔到！

早喺去年十月，阿莊已表明，可靜候上實（00363）股價回落到34至35元水平入市，估唔到要等到呢個月先至等到上車機會，上周五該股收市報33.95元。

近兩年上實積極推動資產重組，未來會以內房及公路基建為主營業務。參考北控（00392）成功轉型至主攻燃氣等公用及基建業務，過去三年業績和股價表現都大躍進，上實喺過去兩年已剝離多項非核心業務，增加土地儲備及公路項目，估計未來兩、三年，業績將可反映重組所帶來的成效，股價既已回落至心水買入價，阿莊計劃短期內入市先下第一注，中長線半百目標價仍然未變。