港股反彈告一段落，恒指未能企穩在20,600點水平之上，暫仍未脫離危險期，不過尋日回吐380點，報收20,341點之際，成交金額只有609億元，反映沽壓唔算太大，周初恒指19,800點似乎已經成功尋底。
志強既然無貨在手，見昨日英皇證券（00717）在跌市中表現硬淨，以每股平均價0.54元買入20萬股，若然走勢出現突破，唔排除再加碼。
大市靜過鬼，稍為有股份現鑊氣，即時成為市場焦點，上市幾日的美克國際（00953），尋日就吸引到炒家嘅目光，盤中曾高見1.64元上市後高位，雖然午後隨大市回落，升幅收窄，最後收報1.51元，仍錄得5.5%升幅。
美克招股時，IPO部分錄得逾四百倍的超額認購，令唔少投資者對其有一定憧憬。可惜上市首日表現麻麻，僅較招股價升0.7%，令人失望。不過美克係運動用品生產商，料今年可繼續受惠內需增加，同類股份如特步（01368）、匹克（01968）跟361度（01361）等，上市後均有唔錯表現，現價均較招股價升逾兩成，志強相信美克亦唔例外，呢個位買入，至少仲有兩成上升空間。