聯想利好因素已反映

市場對聯想（00992）元老級人馬柳傳志出山，充滿憧憬，結果似乎沒令捧場客失望，剛交出截至去年十二月底止的第三季度業績，超額完成，虧轉盈賺7,952萬美元（下同），比大行估計的4,000萬至4,800萬元理想，使首三季累積利潤增加2.1倍，去到1.17億元；成績曝光，股價先急跌後企穩，事關睇真啲第三季有一筆4,340萬元，透過出售資產及上市股票所得的一次性收益，剔除後其實業績同市場預期差唔多。

睇番聯想股價年初至今升17%，較恒指同期跌6%跑贏一大截，以547億港元市值、估計一一年賺2.5億美元計，市盈率唔低，差不多要二十八倍，比國際PC品牌都要高，「柳傳志溢價」同年中推出智能手機「樂Phone」嘅因素唔少已經反映咗，睇嚟只適合在較大的調整來臨時入貨。

奧巴馬為救民望，繼續將華爾街賓架列為首要炮製對象，可能一時間滿足到選民及納稅人，但長遠將摧毀美國精神，亦可能把彰顯美國國力的金融業，大大打擊。奧巴馬由限制花紅、禁止銀行坐盤炒賣到限制投資規模，可以想像未來美國銀行與一眾投行，將會好似孫悟空戴上金剛圈咁，空有功夫但無用武之地，未來盈利能力亦肯定大打折扣。

尚幸我哋身處於受金融海嘯影響較輕微的亞洲，假如歐美嚴格監控金融投機活動，可能令更多對沖基金及投行選擇遷到亞洲，尤其是條例上更為寬鬆的香港及新加坡。

講開銀行，中銀香港（02388）公布首九個月業績，賺94.74億元，升35.6%。港元孳息曲線平坦，短息近零，而借貸利率仍然向下，本來對淨存款銀行的中銀比較不利，首三季淨利息收入就減少一成一，得123.8億元。

業績表現重上軌道

不過，金融海嘯衝擊成為歷史，在毋須為迷債及投資項目減值，相反部分減值得到回撥，加上貸款質素續有好轉，期內淨減值準備大跌99.6%，從58.7億元降至2,100萬元，可以預期業績已漸漸走出金融海嘯的影響，恢復正常。

中銀一○年預測盈利160.8億元，以1,846億元市值計，預期市盈率11.5倍，睇番○四至○八年的太平盛世，中銀歷史估值介乎十二至二十倍，現價其實幾抵買，至少預期股息超過5厘，買佢嘅股票，至少勝過存錢入去。