中國澱粉（03838）及航天科技（00031）配股集資，聽聞仲有其他二、三線股部署「抽水」行動。近期十友控股（00033）股價及成交上升，公司自願披露不明異動原因，確認正斟緊好幾個投資項目，惟尚未落實。

十友異動可留意

截至去年六月底，十友手頭現金唔到3,000萬元，即使去年度業績發盈喜，意味賺多咗錢，但若落實新投資項目，相信炒高股價配股係正路嘅猜想。

講開又講，當日見呢隻喺美國做「一蚊店」嘅公司能夠喺主板上市，阿莊亦印象尤深。目前，大股東持股逾七成，斷估街貨唔多，加上「揸弗人」係財務及會計界專才，股價異動「空穴來風」，會唔會係因為公司執到「筍」嘢，就要拭目以待。

神州數碼（00861）將於下周二宣布第三季度業績，翻查資料，公司中期純利為4.12億元，同比增長69%，保守估計第三季度純利與次季相若，則首三季度純利約5.6億元，全年純利按年增長可能不及往年，但預測市盈率亦只係十七倍左右。

去年十一月及十二月，先後有神數股東配售舊股，配股價都喺9元樓上。可留意下周業績表現，若其後股價有震盪，11元邊可以小注一試，目標再向14元推進，惟10元關不容有失。