本文重點
美股前晚再度高收，帶動亞太區股市來一次較似樣嘅反彈，恒指最高曾見20,780點，收市報20,722點，升449點，大市成交690億元。不過，阿莊始終覺得，恒指喺20,800至21,000點阻力非輕，短線博反彈，有胡要識得食，切忌貪勝不知輸！
今日係立春，正所謂一年之計在於春，唔少投行都陸續發表今年股票推介，摩通及里昂都不約而同推介消費股及互聯網股，昨見相關股份普遍上揚，上月遭基金大手沽空嘅騰訊（00700），昨日升5.9%。
中海油（00883）今年所訂嘅目標產量高於市場預期，包括美銀、大摩、瑞信、法巴等投行紛紛唱好，刺激中海油股價昨日急升9.4%；而同系公司中海油服（02883）亦升10%，報10.86元。由於短線升勢甚急，若然手持嘅貨有利潤，阿莊會喺挨近13元食胡，袋袋平安至上﹗此外，周初阿莊表示，有意增持蒙牛（02319），昨日遂以平均價24.7元買入2萬股。
食住內需股條水，可以留意統一（00220），公司主要喺內地銷售方便麵及飲料，屬低端消費品，喺內地致力推動農村發展，提高農民收入之下，農村消費市場方興未艾，對統一而言可謂「商機處處」。
農村市場潛力巨大
再看今年原材料價格只係穩中有升，憑着公司擁有全國性嘅大型食品消費品牌，有能力維持穩定嘅毛利率，配合飲料市場較快增長，整體銷售將更勝去年。
股價走勢方面，由上月初高位5.95元回落至近日低位4.66元，累計跌幅超過兩成，4.7元水平承接應該經得起考驗，可小注撈底，目標重上5.5元，穿4.5元止蝕。