本文重點
果如阿莊所料，恒指昨日反彈至接近10日線（20,600點）遇阻，加上午後A股回落，恒指急速回吐，一度倒跌，收報20,272點，升28點，大市成交628億元，期指更大低水108點。有心理準備，春節前恒指會繼續喺19,500至20,500點水平上落。
雖然指數表現欠佳，但部分二、三線價股繼續收復失地，其中天能動力（00819）升11%，報3.31元；通達集團（00698）升12%，報0.315元。昨日提及嘅田生（08136），一度衝高至0.69元，短炒有足夠水位食胡，但午後急速回吐，收報0.6元，跌3%，咁大波幅，炒呢隻股真係要藝高人膽大。
盈喜預告純利激增
中鐵建（01186）最近發出「盈喜」，預計去年度純利按年增長五成以上，主要係受惠內地加大基礎設施投資，旗下嘅工程承包及其他各板塊業務有較大幅增長。
資料顯示，中鐵建前年純利為36.438億元人民幣，假設按年增長五成，即去年預測純利約54.6億元人民幣。去年首三季，該股純利為36.75億元人民幣，然則第四季純利達17.85億元人民幣。若去年第四季嘅經營表現可於今年持續，預測今年純利增長達30%以上。
雖然去年中央政府為救市而大興土木，但基建股表現遜於大市，皆因身處去年嘅大升市，投資者都傾向選擇回報較高嘅股份，以防守性為主嘅基建股並非首選之列。
不過，風水輪流轉，股市喺去年大幅反彈過後，展望今年市況可能是有波幅但冇升幅，投資者將尋求較具防守性嘅股份，收益基礎穩定嘅基建股或可重拾投資者歡心。策略上，10元樓下不妨買些少中鐵建「壓年」，中長線目標回報率兩至三成，跌穿9元先行止蝕。