本文重點
常言道：「食得是福！」不少城中名人除咗識搵錢，亦都識飲識食，余錦基肯定係其中嘅表表者，不過，太子日前响中環見到基哥，發現佢清減咗唔少，不禁問個究竟，原來一切都係為健康着想。向來鍾意食嘢嘅基哥話，早前醫生同佢做檢查後發現血糖超標，而且唔係一般超標咁簡單，而係超到再唔改善，有機會搞到腎衰竭，真係唔講得笑，所以基哥為自己同家人着想，最後都要聽醫生嘅勸戒減肥。
做gym節食降血糖
佢用咗一個月就減咗11磅，腰圍亦都減埋，對於向來具分量嘅基哥來講，效果已經明顯。細問基哥有何減肥妙法，原來都靠一般嘅做gym同節食，响中環辦公室隔籬自設私人飯堂嘅基哥話，原本佢都擔心自己忍唔到口，點知原來係得，至於仲使唔使繼續減？醫生話只要Keep住依家嘅體重就可以啦。
記得早前基哥因為血管栓塞而入院做「通波仔」，順便辭埋漢傳媒（00491）主席職位，諗住佢從此會退休享福，點知基哥話佢近期又有嘢諗緊，仲話係同科技有關，不過基哥話佢主要都係搞方向性嘅嘢，尤其係科技嘅嘢，長遠都係交由個仔主理咁話喎。