滙控（00005）行政總裁紀勤正式以香港作為大本營，幫到豪宅市場（至少多一間半山大班屋），路邊社當然唔會錯過機會，四周八吓紀大班來港後，會有甚麼大動作，結果被英國傳媒搶先一步，一份非主攻金融新聞的報紙，揭露滙控有意以互換資產形式，入主中國三大國有銀行，涉及工商銀行（01398）、中國銀行（03988）及建設銀行（00939）其中一間。

看到新聞，還以為昨日是四月一日愚人節，事關滙控即使有錢，要買到三大國有銀行過半數股份，機會極微，事實中央向來要對五大國有銀行有絕對的主導權，亦嚴格控制境外投資者對內銀股的持股比重，唔可以超過兩成，更遑論一次過買到五成。再睇被傳用來交換的籌碼，包括六成二恒生（00011）及兩成交行（03328），市值分別係1,300億及836億元，炒埋一碟都係得2,000億多少少，睇番工行整體市值1.85萬億、中銀1.1萬億、建行1.43萬億，先唔講阿爺要兩間銀行股票嚟做乜，論size真係蚊髀同牛髀，點換？

籌備提高資本比率

況且，滙控本身應該都頭痕緊，事關未來幾年要提高一級資本比率以滿足新巴塞會議協定，邊度有咁多閒錢拎出嚟做大收購呢？

而對於以「慳」而聞名的大笨象，既然與交行交往多年，從內地營運文化到分享主要客戶名冊，都應該有所得着，本身逐步發展內地分行網絡，會比直接收購的機會成本低，最重要是滙控與三大銀行的市帳率比較，看不到交易對提升滙控估值，有即時幫助。

紀勤把大本營遷回香港，當然必有所圖，短期內應是A股上市，身為第一間境外銀行在內地掛牌，內地股民反應好壞，對滙控未來擴大中國業務發展帶來一定啟示。至於未來兩三年業績，筆者留意到市場有頗大分歧，主要是大行對美英企業與民眾貸款違約有頗兩極化的預期，以一○年市帳率1.5倍計，算合理但不算超級抵買，想入貨，會建議等A股上市落實至出手。