掌管全球最大債券基金公司PIMCO嘅「債王」格羅斯，最新撰文指出，由歷史經驗，每次大規模去槓桿化，平均時間長達七年，債王建議信徒們，應該集中火力投資債務較低國家，包括中國、印度及巴西等，事關較唔容易受資產泡沫衝擊。相反，發達國家着重減債工作，難以成為全球經濟動力來源，債王列出公共債務超過全國GDP九成，被視為危險地帶的，包括愛爾蘭、西班牙、法國、美國、意大利、希臘及日本，更強調要避開英國資產，因為高負債可能迫使鎊匯未來需要大幅貶值。

近期港股都幾叫人擔心，上星期兩次試穿20,000點，市場對人行可能限制新增借貸的陰霾，始終揮之不去。這時候睇到滙豐證券一份報告，簡直就係股民嘅心靈雞湯，有定驚作用。

國企股撈底時間到

滙證參考當年沙士時，人行在○三年以銀彈策略刺激經濟，當年情況同今日有啲相同，新增貸款達2.8萬億元人民幣，按年升54%，固定投資金額更達5.6萬億元，升幅28%，落重藥底下，中國由通縮到○四年重返通脹，當時國企股指數在人行出手後從高位回落兩成，重點是，首次出手調高存款準備金率，國企股一個月後已開始見底回升，六個月之後，更完全收復失地。睇番今次國企由高位跌咗一成七，已符合「抽根」前基本調整需要，人行今次在一月十二日宣布調升存款準備金率50點子，距今已接近三個星期，無論由調整幅度到時間，睇嚟都差唔多，如果港股在未來一兩星期仲有餘震，可能差唔多又到撈底之時。

新巴塞爾協定要提高資本充足比率，加上新貸款放緩的疑慮，內銀股是去年第四季調整浪中，最先下沉的板塊，如果相信國企快將見底，論前景論盈利能力，內銀股無疑是長線投資者理想的低吸對象。上星期介紹過市值最大的工行（01398)，理由係估值吸引，且一○及一一年盈利展望良好。查實中小內銀股中，中信行（00998）亦係筆者心目中的可造之材。

市場向來對中信行的資本情況存有疑問，不過早前德銀幫佢計過數，指今年一級資本比率9%，資本充足率12%，唔算低，市場對資本充裕程度有過慮之嫌，中信行今年預期市盈率只得9.5倍，平絕內銀股，近期5元水平支持唔錯，看來已到收集之時。