本文重點
恒指尋日一度失守20,000點關口，收市雖然企穩20,000點樓上，但個市咁弱，短期都好難有轉機。尋日好多股份都殺得好勁，閒閒哋都跌5%樓上，個勢似乎要錢唔要貨。今日期指結算，假如內地股市持續無起色的話，港股都唔會有運行，所以志強繼續採取觀望態度，等20,000點樓下先至開始執平貨。
業績扭虧為盈
中航科工（02357）尋日早段一度升過上3.63元，但大市唔精神，最後回落至3.5元收市，升幅收窄至0.86%。中航科工尋日發盈喜，預期去年業績將扭轉過去幾年虧損情況，錄得盈利。
其實集團附屬公司近日公布的業績都有唔錯嘅表現，所以中航科工成功扭虧絕對唔出奇。除咗業績之外，中航科工最值得憧憬嘅當然係注資，事關母公司完成重組之後，中航科工將成為系內航空業旗艦，市場估計未來三至五年內，母公司會陸續注入1,500億元人民幣資產，所以中長線絕對可以睇高一線。
中航科工近日表現相對硬淨，但係家陣最緊要睇住條50日線，如果跌穿的話，有機會落番去3元水平，到時再買都唔遲，不妨密切留意。