本文重點
港股一度跌穿兩萬點關口，筆者由每日如雪片飄至的讀者求救電郵，可以體會到今次調整無論幅度及殺傷力，都比海嘯後幾次整固厲害。事實短短兩個多星期，港股由年初高峰大幅回落一成二，點數達2,748點，筆者一早都擔心第一季港股表現，但對港股的反撲乏力，仍感意外。傳統智慧話，壞消息盡出，就係入市良機，看來一日未見人行出手加息，股民嘅「抽根」恐懼症，一日都唔容易根治，但大市去到介乎19,000至20,000點，史提芬建議仲係做定功課，搵出心頭好準備銀彈掃貨。
恒隆系出業績，子公司恒隆地產（00101）賺173.51億元，升13.2倍，至於控股公司恒隆集團（00010）則賺95.85億元，勁升9.6倍。一門兩傑有好成績，一來○八年恒隆幾乎零賣樓，盈利基數極低，其次恒隆系去年八月趁豪宅市旺，一星期賣掉持貨多年，近四百伙九龍站君臨天下，提供巨額售樓收入，對樓市氣候的拿捏，確有一手。
現金充裕成優勢
恒隆嫌貴，亦因此絕迹本地拍賣會，手上尚餘君臨天下及奧運站浪澄灣貨尾，待善價而沽，對股價影響其實已十分輕微，反而恒隆系怎樣維護本身的「可持續發展」優勢，才是股民關注所在，看來管理層也深明此道理，預測兩年內內地租金收入將會超越本地，因為本身並無負債不愁人行抽緊銀根，恒隆也計劃下半年趁機增加內地土儲。
恒隆孖寶不像本地地產股，有要高價向港府求地的煩惱，也不涉及內房企業在收緊銀根底下，新盤銷售萎縮的周轉問題，現金充裕反而是抽緊銀根下的一大優勢。但論到股價表現，卻幾乎與一眾本地地產股同步，恒生地產指數由去年十月高位回落17.8%，恒隆集團及恒隆地產則分別跌17.5%及19.1%。有趣是的，一二手物業價格今日企穩海嘯後高位，到底係樓市錯抑或地產股錯？由於前者一般有滯後關係，或許多看一季先可以確定，但對於內地高回報租賃逐漸進入收成期的恒隆系來說，筆者相信今年走勢可望優於其他同業。