本文重點
港股昨日再試兩萬點支持，恒指曾低見19,923點，收報20,033點，跌76點，齋睇下跌點數，唔係跌好多，但睇股票價格，則不論大小都普遍下挫。大市反彈乏力，股民對後市信心盡失，要錢唔要貨！俄鋁（00486）昨天首日掛牌，可以話係「生不逢時」，股價一上場即潛水，全日低位9.65元，收報9.66元，較招股價10.8元低一成。同類股中國鋁業（02600）亦冇晒憧憬，股價繼續探底，收報7.9元，跌3.42%。
滬綜指跌穿三千點
滬綜指昨日失守3,000點大關，收報2,986點，跌32.7點；而深成指則報12,046點，跌115點，兩市主板總成交僅1,492億元人民幣，流入股市嘅熱錢明顯減少，政策不明朗亦令投資者對入市卻步，「滬綜指三千點係鐵底」之說，已不攻自破。
今年首月期指今日結算，淡友先勝一仗。展望二月，農曆新年將至，市況可能維持淡靜。值得留意三、四月企業公布業績期，由於前年同期比較基數較低，故相信企業業績會有好表現。雖然呢項因素某程度已反映喺去年下半年嘅升市，但阿莊認為，今年整體基本因素應該會較去年好，除非今年嘅情況遠比想像中差，否則港股落番19,000點水平，估值可重現吸引力。
阿莊曾持有嘅中航科工（02357）發盈喜，料去年業績扭虧為盈，此乃預期內嘅發展，只是早幾日大市勢色唔對，故決定先行沽出鎖住盈利。該股昨日逆市升0.8%，如今等市況回穩，先再睇位上車。
繼續聚焦防守性股份。領匯（00823）近幾年致力翻新旗下屋邨商場，效益正逐步展現喺業績上。憑着穩定而可觀嘅租金收益，公司有能力維持穩定嘅派息政策。以昨日收市價18.48元計，市帳率1.3倍，息率接近5厘。論估值，料股價喺17至18元具承接，考慮其高息特點，可視為穩陣嘅選擇。