本文重點
自從大笨象遷冊倫敦之後，十幾年來都未見過佢哋高層駐守香港工作，依家坐第二把交椅嘅紀勤話嚟鎮守香港，梗係大件事啦！尋日就有百幾人齊集喺總行列隊迎接紀勤，二十七年前住過香港嘅佢，話對香港有特別嘅感情，不單只係佢早期工作嘅地方，亦係佢長子嘅出生地。
紀勤識做 主動握手
呢位集團CEO駕到，總行未夠九點就已經準備好迎接儀式，再加埋一大班記者、保安、工作人員，總行入口兩條人龍逐漸成形，開頭較為稀疏，隨着時間愈接近九點，人龍嘅長度同闊度就愈來愈擴大，列隊嘅滙豐員工已多到超過150人。
紀勤出現，場面即刻混亂，攝記忙於影相，呢個時候，兩條人龍就開始拍掌，夾道歡迎，個勢好似恭迎皇上一樣。紀勤亦好識做，走埋去同佢哋握手。
太子聽講，列隊嘅員工來自不同部門，但見唔到大家熟識嘅鄭海泉同王冬勝等高層。由於場面有點混亂，佢冇接受訪問就直接上咗辦公室。但為免傳媒無米落鑊，紀勤最終都有接受訪問。大家想知佢上到辦公室會做啲乜，佢話會飲中國茶，因為自己喺英國都有六、七年，所以唔係好想飲英國茶。佢仲話期待盡快投入工作，不負客戶和股東嘅期望。