筆者相信大市調整關鍵，在於○九年環球股市的升幅過大，甚至有超越企業盈利復甦的情況，估值太高揀無可揀，芬佬也樂得年初先來一次大洗牌，放軟手腳，等第二季一切重新嚟過。

中石油估值處低位

擔心中央繼續限制內地過剩流動性，跌市之中，資源股可能是最值得趁機分段吸納的股份，一來石油屬戰略性行業，受國家保護，盈利透明度高；再者，回顧國際油價，儘管與月初海嘯後高位84元比較，回落大約一成，但睇番海嘯後油價一浪高於一浪的形態未改，展望亞洲及新興市場經濟復甦，刺激需求，長遠中國要建立自身的石油儲備，也對油價走勢提供一定支持。近日，證券行對今、明兩年油價走勢都相當樂觀，年終油價目標介乎85至95美元，換句話來說，即係比現價高14.3至27.7%。

中國第一大石油企業中石油（00857），由勘探開採到提煉及油產品銷售均有涵蓋，油價高時暴利稅抽得多，但煉化損失又會減低，可算是天然的套戥，形成平穩向上的油價對業績最有利，過去五年中石油盈利都超過千億，平均有1,280億元（人民幣．下同），市場估計○九及一○年賺1,150億及1,460億元，一○年預測市盈率9.9倍，屬頗合理水平，亦比本身歷史估值低出超過一成二。

至於中海油（00883），專注海外產油業務，收入結構有點像中石油，但卻分享到國家海外石油戰略的好處，透過投資海外油田擴大產能，過去幾年其成績超卓，五年間盈利由161億元升至444億元，○九及一○受實現油價比○八年低的影響，估計只賺297億及403億元，預計市盈率10.8倍，比歷史估值低大約一成。

內地石油孖寶的股價分別由去年十月份高位回落16%及18.2%，一來係受股市氣氛影響，至於炒家對油價也看得太悲觀亦是原因之一，如果75美元支持起作用，看來兩股回吐已差不多完成。