本文重點
港股昨日再跌489點，收報20,109點。誠如阿莊周初所言，若恒指反彈未能守穩20,500點，則期指頗大機會要喺20,000點樓下結算。如今睇嚟，大市會繼續反覆尋底。阿莊昨日早市見勢色唔對，遂以平均價6.5元悉售手持嘅廣藥（00874），獲利4.2萬元。
屈指一算，恒指由本月初高位回落至昨日低位，累跌11.5%。以調整幅度15%計，恒指或要跌至19,200點水平才止跌。然則大市波幅區將下移至19,000至21,000點水平。其實股海浪潮漲退有時，投資者宜以平常心看待調整，退潮時，最重要耐心等候入市機會。
昨日大昌行（01828）臨收市前兩分鐘，股價由3.6元抽高至5.8元，收報5元，係咪醞釀咩重大消息，引來春江鴨，就要等着瞧！
港鐵25元樓下有支持
港鐵（00066）兼營公共運輸及鐵路上蓋物業發展，雖然本地樓價似乎高處不勝寒，但市場供應不多，加上今年公司有望上調客運票價，估計22至25元水平乃重要承接區，可候回落才分段進場。
另外，今年內地水價上調乃市場趨勢，水務股可以視為較具防守性嘅股類。供水業務佔去粵海投資（00270）收入近半比例，其他來自物業投資及發展、路橋、發電、酒店及百貨營運等業務，主營業務收入穩定之餘，亦屬業務多元化嘅綜合性企業。昨日粵投收市報3.99元，預測市盈率約十至十一倍，息率2.8厘。阿莊相信，即使大市繼續尋底，粵投股價再試低位，論估值，應可企穩喺3.5至3.6元樓上，反彈初步阻力喺4.2至4.3元。