本文重點
金管局前總裁任志剛不知不覺退休咗成三個多月，佢接受「公仔箱」訪問時，透露年輕時嘅夢想，佢嘅理想工作竟然係醫生同木匠，因為可以自己親自「動手」做，但佢話自己記性唔好，記唔到啲藥名，所以最終都做唔成醫生。
人嘅記憶力可能好選擇性，任志剛雖然記唔到藥名，但肯定佢對所有財金嘅嘢都記得清楚。
優化聯匯最難忘
做咗十幾年總裁，好多大事都令佢有深刻記憶，太子以為佢最難忘係成立聯繫匯率制度，或者打大鱷。原來任志剛最難忘係○五年優化聯匯，皆因係完全反映到作為金管局高層，要做到居安思危嘅角色。因為佢睇到人民幣匯率制度會有變化，喺件事要發生前，就諗定聯匯嘅優化工作，結果香港面對祖國咁大嘅金融變化，市場都可以平穩度過。
無官一身輕嘅任總最近雖然出任咗一項公職，但佢話仲學緊「hea」，最難適應就係依家身邊無助手，好多嘢都要親力親為，不過好彩有個好老婆幫手。