汽車股尋日又再起動，其中以大落後嘅駿威汽車（00203）表現最出色，高收4.87元，升0.24元，股價已突破下降軌，加上有大成交配合，可確認大升浪展開，短期若能升穿前高位5.54元，上升目標可達8元。
駿威股價究竟有幾落後，可睇以下數據，駿威由去年初嘅2.45元升至高位5.54元，升幅1.2倍，期間吉利汽車（00175）由0.6元升至4.84元，升幅七倍，而東風汽車（00489）同長城汽車（02333）亦分別升咗4.3倍同2.8倍，以駿威嘅前景同盈利，絕對唔會較同業輸蝕，但股價就跑輸幾條街，只要發力追回部分失地，股價見8元，應無難度。
○九年度（十二月結），上半年駿威盈利11.79億元（人民幣．下同）減少4.7%，下半年內地汽車銷量屢創新高，而駿威截至十一月底止，賣出汽車已超過3.27萬輛，達全年目標3.3萬輛嘅99%，應可超標完成，估計全年盈利23億元，市盈率只有十四倍，係同業中最低。