過去半年，由於主要產糖國巴西受天氣影響，令糖產驟降，糖價上升，連帶糖業股早前亦齊齊造好，大成糖業（03889）亦都唔例外，股價一度高見過2.18元，及後雖有回落，但至今仍在2元水平徘徊。
昨日，受同業西王糖業（02088）配股消息影響，大成糖業股價一度被質低至1.81元水平，連20日線都失守埋，惟集團低位承接力強，唔少大行都見出手買貨，最終股價企穩在2元水平樓上收市。
事實上，隨着內地經濟復甦以及國家推動內需下，食糖消費有望保持穩定增長，前景不俗。況且，大成糖業早前亦宣布，已向台灣證券交易所申請發行台灣存託憑證，可視為利好因素。加上糖價上漲，對集團由玉米提煉甜味劑業務有利，故現價具一定支持。
昨日大成糖業的買盤踴躍，就筆者所見，主動買盤就增加至330萬股，而現身買盤最多為德意志，達53次；其次是派杰證券，有32次；宏遠證券亦達12次。雖然這些買盤都並非大手吸納，但大行既然願意在低位出手接貨，力托大成糖業股價重返2元樓上，顯然誠意十足，現價上車等收成風險唔高。