中國搜索引擎市場，去年總產值69.5億元人民幣，雖然內地互聯網仲係發展中市場，但過去幾年網民數目，卻以年增長率五成以上的速度膨脹。然而，內地搜尋器市場的寡頭壟斷情況十分明顯，一哥百度（Baidu）幾乎佔三分之二市場份額，谷歌佔餘下三分之一，兩個巨頭以外，其他公司只佔3.7%。不過，對每年收入達220億美元，相當於1,503億元人民幣的谷歌，內地收入只等於總收入百分之一，威嚇話唔玩，即時的商業損失並不算嚴重，但長遠點向股東交代放棄這高增長市場，則係另一回事。不過，事件不宜過早下定論，事關谷歌都有可能純粹為同祖國，在未來業務自由度方面，爭取談判籌碼。

群雄覬覦谷歌市場

當然，谷歌萬一真係唔玩，最開心肯定係百度，美銀美林估計，未來兩年百度市佔率會升到78%，將目標價調高到505美元，但強調大前提仲係谷歌最後真係唔玩。

百度本身係搜尋市場一哥，一旦群雄割據，瓜分谷歌山頭，史提芬估計餘下的3.7%搜尋器公司，好似搜狐（SOHU）、騰訊（00700）及網易（NTES），爆炸力可能更大，即使市佔率翻一番，都只係三兩個百分點，發揮小即是美的好處。再者，唔能夠排除谷歌如果轉為找內地夥伴合作，甚至找尋內地資產買家，這些三四線搜尋網站亦有望成為受惠者。花旗報告指，騰訊在○七及○八年度，搜尋器收入增長達到73%及72%，到○九年首三季收入7,300萬元人民幣，幾乎已達到○八年全年的95%，增長速度驚人，但相比網上遊戲，搜尋器收入比重仲係相對細小，大約佔整體1%，但以股份溢價，騰訊絕對是最有購併能力的一家，捧場客應密切留意事態發展。