本文重點
人行加存款準備金率之後，全球股市經過一日大插插，尋日大都見到死貓彈，可惜恒指最後都要跌31點收市，報21,716點，如果唔係藍燈籠中移（00941）逆市升2.05元去到79.4元，加埋大笨象（00005）突然轉強，港股恐怕要跌百點開外。
三網融合利科網股
阿莊尋日計劃5.5元樓下買聯想（00992）壓倉底，惜高開後已經無回頭，最後仲抽到上5.9元的接近全日高位收市，錯過機會。
日前溫總在國務院常務會議提出，未來中國推進「三網融合」，將電訊網、廣播電視網及互聯網資源共享，加強融合，目標係二○一三至二○一五年之間實現三網互聯互通。
尋日A股市場科技類及電腦股份普遍上揚，相比下香港市場對消息反應顯得滯後，阿莊就睇中因為批股令貨源增加，以致無跟升的中興通訊（00763）。
中興唔單止係內地3G主要設備供應商，在高清廣播技術及設備上，同樣手執業界牛耳，內地專家估三網融合，未來五年至少帶來6,000億元人民幣的設備投資，毫無疑問，中興會係受惠企業，批股價45元，昨日收報50.65元，接貨者有一成三帳面利潤都唔食胡，可見並非短癮之輩，據聞批貨畀幾個Long only嘅基金接晒，無乜貨流出街外，如果今日仲有51元樓下，值得買番多少壓下倉底，同大孖沙共同進退。