太子知道最近又有人事變動，仲要爆出個大冷門。話說荷銀前股票衍生工具及私人投資產品董事何啟聰（Ivan），喺上年十一月離職後，其去向一直成謎，市傳佢會過檔渣打（02888）或中資銀行做「開荒牛」，點知最後竟「大熱倒灶」。
冀逐步提升市佔率
今次太子收到可靠線報，指Ivan會加盟瑞信，接替股票衍生工具銷售及市場推廣副總裁朱紅一職，並經已喺日前開始返工，下個禮拜就正式對外公布。
瑞信每次有人事變動，都會有一番新搞作。太子記得，瑞信推出牛熊證時，就請咗一批新嘅交易員幫手，後來亦推出全新窩輪牛熊證網站。今次有新人加盟，相信今年佢哋應該會滿腹大計，希望逐步提升市佔率。