本文重點
身為百仁基金成員之一嘅馬雲，尋日喺香港出席咗個由百仁基金同浙江省一齊搞嘅民企峰會。佢一開波就話尋日係佢囝囝十八歲生日，佢第一次寫咗封信畀個仔，希望囝囝可以堅持己見，不要輕易受人左右。同埋要好似佢咁「堅持不懈，永不放棄」咁做事。
踢爆內地復甦假象
講到「堅持不懈，永不放棄」，佢話好多年前搞網搞到好失意，走咗去美國散心。有朋友邀請佢去教堂，有位牧師講道時引用咗邱吉爾一句說話「Never never give up」，令佢深受感動。呢句話嘅神奇力量令佢堅持唔放棄繼續做網絡生意，先至可以成就到今日嘅阿里巴巴（01688）。
馬雲並深信金融海嘯仲未過，而且還創造緊另一個危機咁話。皆因內地面臨真正嘅危機，需要調整經濟結構同擴大內需，但呢兩樣嘢都仲未做到。
經濟復甦只係因為政府掟咗4萬億出嚟嘅必然反應，造就咗樓股齊升、經濟數據靚一靚嘅局面，佢唔覺得咁樣代表經濟復甦。