本文重點
港股反覆偏軟，惟內地股市高收，尾段恒指跌幅收窄，收報22,326點，跌84點，大市成交818億元，收市後人行調高存款準備金率，今日大市或借勢調整，細價股料繼續落鑊。藍籌股之中，航運股昨日升勢持續，中遠太平洋（01199）自上月下旬以來股價反覆向上，昨日更一度升逾13元關，收報12.9元，偏偏阿莊揸住嘅天津港（03382）及廈門港務（03378）表現仍大落後，惟有繼續再坐一會。
基金續押注內需股
近月內需股亦輪流起動，就如體育用品股中，特步國際（01368）喺突破5元後，頭也不回，收報5.34元，升6.8%；361度（01361）昨日更升13.92%，報6.14元。由於今年內地繼續大打「內需」牌，農村消費市場快速冒起，基金喺年初繼續押注內需股，係正路嘅做法。
食住呢條水，阿莊有意再翻兜聯想集團（00992）。去年聯想嘅業務受金融海嘯打擊，以致錄得虧損。管理層因應市況調整策略，全力做好內銷業務，結果取得良好嘅成效。
截至去年九月底止次季度，聯想已扭轉首季度嘅虧損狀態，錄得溢利逾5,000萬美元，如無意外，截至今年三月底止年度應可扭轉虧損局面，明年度將重拾增長動力，若盈利可重回○七/○八年度水平，打個八折，現價市盈率約十七至十八倍。
本月初，聯想股價突破5元關口後，未見有太大沽壓，昨日一度高見5.72元，收報5.56元，成交增加。正正由於公司業績將明顯好轉，加上有新產品推出，展望消息流正面，喺5.5元或樓下再睇位上番車，應該有得諗！