股指期貨推出，配合早市中國出口數字錄得金融海嘯後首次回升的消息，支持中港兩地股市尋日高開，不過好消息出貨永遠是股壇金科玉律，A股午市急轉直下，港股升幅也大為收窄，最終只升115點，報22,412點，筆者認為後市成與敗，22,620點係關鍵，尋日早市高位22,671點只算一次假突破，不過美元昨日兌各主要貨幣跌勢顯著，短期環境似乎好友稍佔優勢。
上月中，華創（00291）與思捷（00330）合作的內地時裝生意宣布拆夥，華創以38.8億元把內地的「Esprit」及「Red Earth」51%權益，賣番畀思捷，當時唔少分析員認為出價接近19.6倍PE，超出預期，認定思捷買貴貨，筆者睇法相反。股市短期是十分有效率的投票機器，經歷三個星期，事實證明，期間恒指升4.98%，華創股價升6.5%，而思捷股價升幅接近華創三倍，達18.2%，長遠邊個着數，一清二楚。
大摩睇好升六成
大摩報告指，市場對思捷期望過低，尤其目前大行估計，思捷需要四年時間，先至有機會交出像○八年一樣輝煌的業績，故此未來任何盈利驚喜或者毛利的改善，都足以刺激股價，而且思捷本身估值低，加上幾乎等同免費重新進駐中國市場，認為現價有六成的上升空間。
筆者認同大摩睇法，但更重要係今次金融海嘯，歐洲零售業的復甦，相對亞洲尤其係祖國滯後得多，今日基金熱錢無出路，中資內需股估值又天咁高之下，思捷不單止染紅概念賣到錢，而且歐洲尤其係德國的生意，預期○九年下半年亦已經見咗底，一○年有充分的條件炒復甦。
價值被嚴重低估
睇番思捷○五至○八年度（六月結），純利由32.1億元翻一番去到64.5億元，○九年遇上金融海嘯衝擊，跌到47.5億元，目前市場估計去到今年六月底年度，純利大約49.3億元，只係輕微改善，不過到一一年六月將回升至58.88億元，查實已經有高峰期九成一。
對於一家零售生意遍存半個地球的企業來說，兩年的倒退不算甚麼，然而預期市盈率12.6倍，大約只係○五年高峰期35.5倍的三分之一，是投資者對佳績太善忘？抑或對前景睇得太悲觀？無論如何，思捷的估值被嚴重低估，是筆者第一個印象，趁熱錢轉向落後股尋寶，思捷值得留意。