本文重點
僑豐金融董事總經理許照中，一向都有寫文章嘅習慣。近日佢忽發奇想，計劃為自己寫一本自傳。佢話自己雖然一生平凡，但到今時今日，雖然唔係好有錢，但都算喺社會立足。佢個細佬許漢忠，即係機管局行政總裁，事業上亦有一番成就，自己都感到好欣慰，所以想為自己記錄吓咁多年來喺工作同家庭上嘅點滴，寫本自傳留畀自己睇。
咁佢打唔打算將本自傳出版呀？佢講笑咁話，可能會將本自傳放喺保險箱，等自己走咗之後，先至交畀老婆處理。
自傳未知幾時開筆，但佢心目中已開始進行構思，估計要完成起碼要寫幾年。咁都好，可以將未來數年發生嘅事，記錄入埋本自傳。
「開枱」賀周文耀退休
許照中仍未言休，但佢位老友，即係港交所（00388）行政總裁周文耀今個星期五就正式榮休，咁許照中點賀周總呀？佢笑說，會喺麻將枱上「祝賀」周文耀退休，因為佢實在太羨慕周總可以退休，直情係有點「眼紅」，所以諗住同佢打麻將時，絕不會「鬆章」。