阿莊有幾睇好隻廣藥（00874）大家都知，周二再增持後就升個不停，破位股真係要追，加上有摩笛幫手，升勢更加一發不可收拾，尋日再升4.5%，去到6.74元，真係威力十足，短期一於坐穩等收錢是也。

放大圖片

放大圖片

內地剛宣布限制稀土出口，希望多留自用，其實係相當合理，稀土係消耗品，用用吓總有用完嘅一日，應該多加保護，不過消息就反映出內地資源有價，中央絕對唔准賤賣資源。

尋日資金狂炒煤炭股，主要係國資委鼓勵內地煤炭企業進行購併，認為可以提升產能的協同效應。

受消息刺激，牛皮多時的煤炭股即時大炒特炒，其實近期雪災嚴重影響內地運煤能力，煤炭價格連月急升，再加上現時國家政策配合，受追捧是理所當然之事，看來未來幾日如果見有回吐，都值得考慮。

煤炭股升得有道理

內地遇上雪災，燃氣供應出現樽頸，令到燃氣價格接連上升，燃氣股亦成為近期當炒板塊之一。濱海投資（08035）本身有唔少燃氣項目，截至去年九月底，燃氣管道網絡累計約有770公里之長，如果剔除重組而剝離嘅30間附屬公司影響，截至去年九月底止六個月內，管道網絡增加咗20公里；期內公司管道燃氣銷售收入為1.42億港元，比去年同期增加咗43%。

不過，濱海當炒，重點並不在於佢嘅燃氣項目，而係佢嘅母公司泰達為天津市第一大國企，手持總資產達到1,400億元人民幣之多，業務廣泛，因此引起市場無限憧憬，如果炒注資借殼變相一體化上市，濱海未來隨時變身航母級紅籌，當中尤以持有嘅大量土地資源最有價值，而去年市場曾傳過母公司注入地皮以壯大濱海嘅傳聞，尋日又見突然開車，今轉破頂機會好高，短炒目標1.15元，止蝕位就訂在0.83元。