蔡漢平啱啱喺一月二日出任利基（00240）旗下基利承建嘅董事，原來佢之前去咗中東兩年，但係屋企人就唔多習慣嗰邊嘅生活同文化，所以諗住返香港，咁啱利基主席單偉彪想做多啲建築生意，所以就叫佢加盟幫手。
香港建築業多商機
蔡漢平做咗呢行三十幾年，當初係學師出身，早兩年同老婆囝囝過咗去中東。佢先後喺俊和（00711）同新地（00016）工作過，好熟建築行業，咁啱利基個起樓部門想擴充，於是就請咗蔡漢平幫手。
蔡漢平同太子講，香港政府明年基建預算有成500億，加上又有好多學校興建、新醫院要起，個餅愈來愈大，所以建築行業未來有好多商機。