本文重點
恒生銀行（00011）一向都重視人才，從上個月該行副董事長兼行政總裁梁高美懿親自同100位MT（管理培訓生）候選人分享個人經驗可見一斑。講開人才，好多家機構都設有talent pool，專係畀啲極具潛力嘅人才加入，恒生原來都有talent pool，由部門主管睇得起又提名嘅員工先至有得入局，其中唔少係MT。
八千員工選數十人
由於個pool只得幾十人，相對成家銀行大概8,000人，即係話所佔比例真係細到不得了，唔怪得之恒生嘅一般職員好多都唔知有呢個pool。
就算被提名，嗰啲員工仲要過五關斬六將先至有資格加入個pool。如果順利入局，咁就大把運行，可以成為銀行重點栽培嘅對象，機會自然比別人多，好似話加人工都特別多，升職又快啲。當然都要睇番個人嘅表現啦，唔係話入咗pool就等於做咗神仙，銀行每年會評估佢哋嘅表現，表現稍為失準，恐怕都會被踢出局。