港股昨日在成交顯著上升下，恒指升2%，收復50日線，收報22,279點，升456點；國企指數跑贏大市，升逾3%，收報13,142點，升391點。志強見中國森林（00930）連升幾日，尋日以每股2.43元沽出廿萬股套利。跟手買入廿萬股中航科工（02357），平均價3.26元，收市報3.32元，短線目標價3.5至3.8元，跌穿3.2元止蝕。
踏入一○年，美元反彈似乎告一段落，除咗金價回復強勢外，貴賤金屬價格亦於高位徘徊，資源股再成為市場焦點。志強留意到中國鎳資源（02889）股價已展開升浪，昨日成交顯著增加，升勢有餘未盡。
睇番中鎳舊年確係幾慘情，截至十二月底止的○九年上半年虧損7,985萬元，不過，近年開發的非焦還原提純技術獲得重大突破，去年八月開始全面恢復生產，下半年業績大幅改善，盈利達9,000萬元，每股盈利4.3仙，相信集團最壞時間已過，加上貨源歸邊，估計街貨唔過兩成，只要基金有買盤殺到，其升勢將會加速。
尋日中鎳成交額顯著上升，睇盤路有基金入場積極買貨，短線目標2元，跌穿1.5元止蝕，志強要吼個靚位上車。