港股假後反覆偏淡，大市亦由早段一度升逾200點，到收市倒跌37點，但上升股仍有613隻，可見資金未有流走，個別逆流而上嘅強勢股仍然值得追捧。
福山能源（00639）尋日一支大陽燭高收7.74元，升0.26元，股價已突破由月中高位8.1元回落形成嘅下降軌，並遠遠拋離各條平均線，可確認調整完成，一旦升穿前高位8.1元阻力，照度上去，短期最少可見8.8元，中線睇10元樓上。
福山自成功轉型為能源股後，現正加緊發展步伐，繼收購山西省三個煤礦之後，正計劃收購內蒙一個年產能達200萬噸嘅新項目，另外亦有一個年產能達400萬噸嘅燃煤項目，正待發改委審批。
福山為加強業務多元化，向母公司首長國際（00697）收購澳洲鐵礦股權，總代價17.94億元（以每股5.55元發新股支付），收購完成後，福山將實際持有澳洲MOUNT GIBSON18.71%權益。內地經濟復甦對鋼鐵同燃煤需求大增，福山在母公司大力扶持下，注資行動持續，發展潛力極大，值得睇好。
福山能源（00639） 目標價：8.8元 止蝕價：7.4元