本文重點
政府昨日拍賣大埔兩塊地皮，結果由信置（00083）為首財團投得，成交價合共104億元，表現略遜市場預期。顯然，信置喺周邊已有地皮，各大發展商都好合作，成人之美，免再製造天價成交，勾起市民對高樓價嘅不安。
未知是否賣地成績未及市場預期，港股上晝升得好哋哋，尾市表現急轉直下，最後更倒跌收場，恒指收報21,480點，跌36點，但大市成交僅381.5億元，可見元旦前假期氣氛仍揮之不去。
中國燃氣（00384）昨日升5.9%，收報4.26元；阿莊持有嘅北京控股（00392）亦升3.99%，報56元。若想冷敲落後股，可以留意新奧燃氣（02688），若股價確認突破20元關，將有一番新景象。
提及投資組合，阿莊會睇位增持中旅（00308），另正留意藥業股廣州藥業（00874）嘅表現。此外，昨日提及嘅恒鼎實業（01393），收報9.9元，升3.88%，走勢對辦。
半新股輪流翻炒，利邦（00891）升5.98%，報3.19元；中國秦發（00866）升7.98%，報2.3元。另外，喺本月十八日掛牌嘅勝利管道（01080），昨日重上「水面」（招股價2.2元），高見2.3元，收報2.21元，升5.7%，成交2.35億元。好不容易重上招股價，加上交投配合，相信升勢未完。
成功重返招股價
勝利管道乃內地最大型嘅石油及天然氣管道生產商之一，專注於運送原油、成品油產品及天然氣等嘅螺旋弧焊管進行設計、製造、增值加工和服務。截至今年中，旗下年產能為54萬噸嘅七條SSAW焊管生產線，喺內地市場份額由去年底嘅17%增至22%。
招股書所載，截至今年底止，公司預測年度除稅後綜合盈利將不少於3.3億元人民幣，相等於預測每股基本盈利不少於0.1375元人民幣，即現價預測市盈率約十四倍。由於業務性質較為獨特，加上喺市場具領導地位，論現價估值，應具可塑性。短線若成氣候，目標2.5元，止蝕2.05元。