本文重點
聖誕節假期番嚟，氣溫突然急降至十幾度，太子都唔知幾想捐喺「被竇」度，不過，向來勤力嘅合和基建（00737）董事總經理胡文新，尋日就冒着寒風出席內地珠江三角洲西岸幹道第三期（西線三期）嘅動工儀式，由於呢個項目係合和基建及廣東省公路建設公司各佔50%，故有好多廣東省及中山市嘅官員嚟撐場。
廣州至珠海少一個鐘
胡文新對西線三期呢個項目都好緊張，因為總投資額都要成56億元人民幣，佢估計工程需三至四年完成，而西線三期全長38公里，北端與西線二期在中山連接，並向南伸延連接珠海高速公路網。
胡文新同太子講，待西線三期落成，與西線一期及二期全線貫通後，第日由廣州至珠海嘅行車時間由目前超過兩小時，縮至少於一小時。