臨近年尾，本港經濟前景確實見到曙光，由金融業、零售餐飲業至旅遊服務業都開始復甦。不過，對於來年的本港經濟前景預測，不如由市民親自評論，相信代表性可能較政府官員，甚至各界老闆更準確。
經濟未完全復甦
Alexis（大學生）
「香港嘅經濟仲未完全復甦晒，我諗未見底添！所謂『低處未算低』啊！金融海嘯嘅影響應該會持續，最快要等到明年年中之後先會明朗啦！我依家讀緊教育學士學位課程，畢業之後有機會成為教師。而經濟困難同埋依家多數新入職教師只能獲得合約聘用，所以我估畢業之後人工會比之前少。」
加咗薪會多消費
陳先生－25歲（於髮型屋工作）
「經濟的確係好咗少少，我見多咗客人嚟剪頭髮！公司生意多咗，都有加人工，雖然加得唔多，都係多1%左右。不過加咗人工，自己買嘢嘅支出都有所增加。（會唔會趁經濟好考慮跳槽呀？）無呀！現階段唔會囉！」
客人買嘢要諗過
陳先生－23歲（手袋售貨員）
「其實都睇得到人流多咗，喺自己公司情況就更明顯！客人多咗10至20%，以內地女士居多。不過咁，啲客人都唔係好疏爽，都要考慮吓先會買囉！生意多咗，人工都加咗呀，依家都有10,000至15,000元收入，都算唔錯。自己平時無咩消費，不過就有諗過去旅行！跳槽？應該唔會轉工住，因公司都有晉升機會。」
市場氣氛轉好咗
Polly（保險業人士）
「相比金融海嘯發生嗰陣，經濟最差嘅時候，依家市場氣氛的確好咗。我從事保險業嘅，呢排同啲客傾嗰陣，都覺得啲客普遍對前景變得比較樂觀。我諗，香港經濟復甦仲需要啲時間，如果要去番海嘯之前嘅情況，可能要等到明年年底啦！」
搵工仲係好困難
廖小姐－18歲（專上學院學生）
「雖然失業率跌咗，但係我見好多師兄師姐搵工，只有銀行業比之前容易，其他行業都仲係難啲！而我自己就讀設計，打算將來都喺呢行做喇！至於經濟其實都係好咗嘅，因為我行街嗰陣都發現多咗人，尤其係內地人囉！我無做兼職，都係用爸爸媽媽畀我嘅零用錢，所以即使經濟好咗都唔係好關我事，自己嘅消費同平時差唔多，都係Shopping多啲！」