由於超大屬民企股，投資界一向對民企管治存戒心，故見超大估值一直偏低，現價計往績市盈率才4.8倍。不過，大行麥格理近日發表報告，指超大嘅公司披露有改善，經深入走訪過後，對公司明顯較為安心，雖然重申公司管治風險尚存，但仍將該股目標價由4.6元大幅調高至12元，並給予「跑贏大市」嘅投資評級。本月初以來，超大股價反覆向上，昨日逆市上升5.2%，收市報8.46元，似乎真係有大盤捧場。就趁吓熱鬧，小注怡情，博走轉快，目標上望9.5元。

錦江酒店可博反彈

配搭其一選錦江酒店（02006），事關早前公司進行系內重組過後，發展策略明朗化，加上明年上海舉行世博，料可帶動區內旅遊業，錦江嘅酒店業務應可受惠。趁近期股價回軟，可睇位落注，反彈目標睇2.55元，穿2.05元止蝕。

另外，雖然近日市況不濟，但不難發現有大戶在收集內需股。畢竟內地講到明會繼續打「內需牌」，內需股股價跌到咁上下，又會見到大盤出嚟護航。

中國動向（03818）近月股價偏軟，但成交未見大增，加上估值較同類股低，相信股價回落到5.2至5.3元水平具承接，低吸此其時。