思捷昨日下午復牌，收市跌3%，報48.45元。查實華創出售合營權益，唔係因為合營冇得搞，而係因為要配合本身嘅業務重組策略，專注搞啤酒同超市等核心業務。至於思捷，今次回購合營股權作價相等於○八年度市盈率二十一倍，可能因為作價較市場估計為高，加上大拿拿攞30幾億現金進行收購，故股價見受壓。

不過，思捷應具足夠財政實力完成是項收購，加上今次思捷是購入一門具盈利前景嘅業務，股價亦消除了一個不明朗因素。未來一年，主要概念係炒海外業務復甦，股價喺50元樓下，可以人棄我取。昨日阿莊亦忍唔住手，以平均價46.8元買入10,000股。

金飾零售股六福集團（00590）截至九月底止，中期收入20.87億元，同比增長15%；純利1.88億元，增長52.8%，每股盈利38.26仙，派中期息每股15仙。受惠業績消息帶動，六福股價曾高見6.49元，收報6.4元，升12%，現價預測市盈率8.4倍，息率3厘，短線有力挑戰7元關。

全年業績回復增長

同類股中，周生生（00116）截至今年六月底止，半年純利2.41億元，同比下降18%，每股盈利40.1仙，中期息每股7仙。由於年結日不同，故不宜跟六福業績直接比較。查實今年上半年業績明顯較去年下半年有改善，而以今年第三季嘅銷售市道看，相信下半年業績可勝於上半年，全年計業績將重現增長。

周生生現價預測市盈率約十倍，雖然估值略高於六福，但資本負債比率較低，為12%，且尚持有市值6.7億元嘅港交所（00388）股份，吸引力並不遜色。

事實上，每當大市急升之際，類似周生生呢類穩健型消費股冇乜人吼，但當大市缺乏方向，就係呢類股份發圍嘅時候。昨日周生生收報9元，升3.45%，睇勢呢浪可叩10元大關，短線波動落番9元樓下，可以留意趕搭尾班車機會，50日線支持在8.2元。