本文重點
摩根士丹利每年都組織班管理層一齊唱聖誕歌，慶祝聖誕之餘仲為慈善機構籌款，今年大摩八十位管理層就喺聖誕樹下獻唱七首歌。領唱嘅亞洲首席執行官唐奧文就宣布，今年嘅善款數字有190萬元，破晒歷來紀錄！咁開心，唐奧文仲帶埋囡囡一齊唱聖誕歌添。
七首歌籌得190萬
話時話，今年已經係大摩第十二年支持「愛心聖誕大行動」（Operation Santa Claus），仲組織咗個董事合唱團，通過歌聲籌款，而大摩班管理層亦已經連續七年獻唱，今年經濟氣氛好轉，連帶捐款數字特別多，喺十二月十一日起短短一個星期，大摩嘅員工、客戶同夥伴已經成功籌到190萬元。今年嘅受惠團體主要係生命小戰士會（Little Life Warrior Society），佢哋主要幫助患有癌症嘅小朋友。
尋日下午五點半，合唱團準時開唱，一齊唱嘅除咗香港保護兒童協會嘅小朋友外，有好多管理層帶埋佢哋嘅仔女上台獻唱添！