呢兩日港股都係高開低收，走勢似乎麻麻，投資氣氛轉弱，唔少炒家擔心資金流走，恒指跌202點，收報21,611點。好彩成交縮水，相信唔少芬佬都開始放假，短期又無利好消息支持，暫時都係難炒。
志強見華基光電（00155）兩次升上0.172附近又遇阻力回頭，朝早以0.168元沽出，太耐唔行都係先走人。海爾電器（01169）逆市上升值得關注，以每股4.98元買入5萬股，反正有資金換入消費及內需股，應該仲有得去。
中國燃氣（00384）尋日逆市微升，收市後公布中期業績，截至今年九月底止，錄得股東應佔溢利4.32億元，較○八年同期增長484.78%，每股盈利12.95仙，不派中期息。
中燃份業績反映其業務發展理想，集團較早前重組，增持上海中油能源權益至94.85%和增持中油華電至78.73%股權，中燃更擬將部分中油能源股權售予中石油，以配合將中油能源於三年內在上海上市。
瑞銀發表最新的報告建議買入中燃，目標價更由3.8元調高至5元，志強打番個折，先睇4.5元，跌穿3.35元止蝕。