特區政府要遏止豪宅炒風，上個月收緊兩千萬元以上豪宅按揭成數，之後樓市交投的確靜咗，可是卻未見劈價潮出現，講到尾，今日按揭息口低到離晒譜，以拆息基準，據聞最低做到連手續費年息0.7厘，換算成月息不過0.058厘，即使業主們吉咗間屋唔租出去，揸貨成本仲係似有還無，大可等到樓價反彈，只要低息期持續，政府點樣擺姿態都係無用。

放大圖片

放大圖片

月底兩幅大埔豪宅地皮拍賣，日期揀喺廿八號，夾喺聖誕同新年中間認真騎呢，斷估係政府明知要壓抑樓價事倍功半，又唔想觸動市民大眾對高樓價的神經，所以揀時間都揀得低調啲。

樓市僵局可望突破

兩幅地勾地成本每呎超過5,000元，市場估計，臨海豪宅地賣少見少下，最後拍板價隨時在7,500至8,500元範圍內，以過往幾年賣地經驗，麵粉拍住甚至貴過麵包價的成交，每每牽動一二手盤市場，史提芬相信拍賣之後，目前樓市賣嘅唔肯減價、買嘅唔敢追價嘅僵局，有機會出現突破。

仲有唔夠兩星期賣地，地產代理股美聯（01200）連日偷步被掃高，尋日再升0.2元，收報6.9元。

去年金融海嘯，人人以為樓市進入漫長的冰河時期，結果連美聯自己都大跌眼鏡，最後要出盈喜。上半年賺2.72億元，勁升七成，市場估全年賺4.84億，市盈率10.5倍。地產代理行業高低周期明顯，理論上市盈率唔應該太高，但諗深一層，代理業務响香港屬於寡頭壟斷行業，成功營運模式亦正開始在中國其他城市複製，從這方向去想的話，估值應該仲有一定提升空間，再睇○七年上次樓市高峰，美聯市盈率最高見過16.6倍，賣地前夕，值得一試。