鋼材股昨日個別發展，馬鋼（00323）逆市升2.8%，報5.87元；首長國際（00697）亦反彈4.4%，收報1.87元。上周五，馬鋼股價突破5.5元阻力位，股價急升而成交大增，雖然本周一、二連日回吐，但成交明顯縮減，昨日逆市上升，可見走勢偏強，可以望多兩眼。

放大圖片

放大圖片

紅籌股之中，昨日較矚目嘅係方正系股份異動，方正控股（00418）曾高見0.52元，收報0.51元，升10.8%，成交1,216萬元；方正數碼（00618）全日高位同為0.52元，收報0.47元，升17.5%，成交1,965萬元。

阿莊唔只一次講過，今年唔少紅籌股股價大翻身，皆因呢啲紅籌股決心重組業務，去蕪存菁，令投資者對公司嘅盈利前景有所改觀。十一月以來，方正系股份頻見異動，且成交增加，唔排除正醞釀大動作。

紅籌熱炒重組概念

母公司方正集團目前主要經營IT產業及醫療醫藥業務，其他投資包括方正證券、江蘇蘇鋼集團等，在港上市嘅方正控股及方正數碼均從事IT產業，其中方正控股從事專業化行業應用軟件系統解決方案以及軟件產品供應，而方正控股旗下嘅方正數碼，則主營分銷訊息產品及軟件業務。

雖然兩家公司去年都賺錢，但現價計市盈率都講緊廿倍樓上。今年上半年，方正控股轉虧，蝕1,525萬元。截至六月底，方正控股手持逾4億元現金，NAV為0.346元；方正數碼則手持現金2.2億元，NAV為0.272元。

上月下旬，方正數碼曾披露，已終止洽購一內地物業發展公司嘅權益。雖然洽購新業務未成事，但公司正尋求業務轉型之意甚明。究竟系內係咪部署資產重組，阿莊跟大家一樣，都係得個「估」字，但睇股價交投和成交異動，正所謂「空穴來風」，就放長雙眼等着瞧！