本文重點
尋日一早，睇見港匯異動，貼實7.7500強方兌換保證接近兩個月的美電，突然抽上7.7516，論點數係小事，但上次美電轉強係八月底，當時市場擔心熱錢流出，港股插到19,400點，今次係咪又一次狼來了故事，恐怕要睇多幾日至知，尤其要睇周三聯儲局議息聲明，會否為低息預期來個修正，但諗唔到港股尋日最後竟V形倒升，收報22,085點，升183點，原因係上午收市前，阿布扎比表示願意注資100億美元協助財困的杜拜政府。由阿布扎比的聲明，其實注資計劃條件都幾辣，真金白銀出資前，仲係等杜拜世界先同債權銀行達成債務重組協議，但股市悶咗幾日無消息，炒家抱住有賭未為輸的心理，實行炒高至算。
國資委公布，轄下132家中央企業，截至十一月底營業收入及利潤，終於出現今年首度同比增長，升3.4%，實現利潤7,500億元（人民幣．下同），超越○八年的6,962億元水平。在中央4萬億元刺激經濟計劃，加上樓股兩旺，財富效應推動下，中國經濟復甦比歐美國家來得更早，企業盈利重現增長曙光，有助把現時有點過高的國企股估值，在未來一至兩年拉回較合適的水平。
連日來介紹過幾隻心水內需及食品股，今日想寫一下超大現代（00682）。這家出產及銷售農產品的民企，可算內需股平霸，預期市盈率只有6.1倍，歷史市盈率平均也是七倍左右，與動輒二十甚至三十倍市盈率的內需股比較，完全係兩回事。
超高毛利惹人疑
市場對超大評價低，原因唔少，盈利及管理透明度低外，在股息政策上超大也十分吝惜，過去三年只把賺來的3至7%派給股東。另外，超大的超高毛利率，向來被人質疑，過去十年毛利率介乎66至75%，種菜種到賣10蚊有7蚊利潤，且連續十年盈利有正增長，先唔講農作物是否有如此厚的利錢（否則內地農民老早應該發晒達），作物當造與失收，也完全不曾影響業績，難怪投資者長期質疑超大業績。十月中出業績增長1.03倍，撇除重估項目實質9%增長，唔算標青，但內需股實在已炒得離譜，芬佬唔介意趁業績後三幾個月安全期炒一炒落後，業績時才5元左右，今日8.37元，短短時間升近六成七，或許短期未升完炒炒無妨，但講到要長相廝守，始終叫人難以放心。