上周五恒指牛證有8,563萬元資金流出，恒指熊證則有1,500萬元資金流入。顯然，當大家都睇淡後市，大戶就挾畀你睇。阿莊上周講過，若今轉確認失守50日線，後市可能出現較大嘅調整；但若守此位回升，則試破23,000點嘅動力會增強。既然大戶睇住散戶揸沽做嘢，如非必要都係暫避指數相關產品為妙。
新股龍源（00916）上周四掛牌，牛皮兩日，昨日終於開車，高位曾見9.96元，收報9.84元，升7.78%。雖然龍源估值唔算便宜，但勝在所屬產業具政策支持，再生能源概念長炒長有，以昨日嘅成交額多達26.7億元計，相信升勢未完，短線目標睇11元。
國家能源局發布，十一月全國全社會用電量環比增長4.77%，同比增長27.63%，同比增幅較十月份上升11.76個百分點。好明顯，內地電力需求已重拾增長軌道，但問題係，要衡量電力股嘅投資價值，除咗用電需求之外，煤電價格亦十分重要，季內煤電價格亦同步上升，故用電量增長對電力股嘅股價刺激作用亦要打折扣。
上周阿莊提及過香港中旅（00308），昨日以平均價2.18元買入20萬股，會作中線持有。此外，手持嘅天津港發展（03382）昨日披露，收購天津港股份56.81%權益嘅交易已獲中證監批准，公司正努力盡快完成交割。陰霾漸消，阿莊打算短期內再睇位增持。
有色金屬股之中，最近有高層人士變動嘅五礦資源（01208）值得關注。五礦資源上周宣布，王立新任公司副董事長，但留任非執董，同時，崔虎山辭任非執董，位置由前任中國五礦高層嘅李連鋼取代。
市場揣測，是次高層變動，係母公司（中國五礦）向五礦資源注資嘅前奏。目前，五礦資源主要從事有色金屬經銷、製造及鋁、銅製品分銷，乃中國五礦有色業務嘅海外平台。
母公司注資有眉目
今年六月，中國五礦完成入股澳洲第三大礦業公司、全球第二大鋅公司─OZ礦業，其他海外項目還有與智利國家銅業公司嘅合資銅項目，以及與江西銅業共同收購嘅加拿大北秘魯鋼業公司。理論上，這些項目都有機會注入五礦資源，以發揮其作為母公司資源業務海外平台嘅角色。
上月，屬姊妹公司嘅五礦建設（00230）獲注入房地產業務，相信母公司下一個注資目標會係五礦資源。即使撇除注資因素，五礦資源目前處於淨現金狀態，截至今年六月底止，淨現金盈餘達8.2億元，手頭現金及等值20.44億元，每股資產淨值3.03元，現價較之折讓20%，再看母公司目前嘅持股量（63%），一旦獲得注資，大可現金加發行代價股票支付。橫睇豎睇，依家呢隻股無論睇估值和注資誘因都係值博，首站先睇3元，止蝕位2.1元。