美國眾議院在香港時間上周五晚上，通過近大半世紀以來美國金融市場最大的改革議案，通過對聯儲局下放更大的監管權力，成為未來美國金融監管的最前防線，以後大型金融機構無論運作、購併，以至貸款及制訂信用評級，以及衍生工具交易都要被聯儲局監管。雖然話你有張良計，我有過牆梯，好似美銀（BOA）早前已速速從華爾街集資還錢畀政府，希望唔使樣樣綁手綁腳。

其實「九一一」事件加埋金融海嘯，聯儲局監管權力早已坐大，今次美國政府借美國金融業部分害群之馬搞出個次按風暴，趁機塑造聯儲局變身成超級監管機構，無形之手變得更加無遠弗屆，係咪等於自由經濟理論正式入土為安，仲係言之尚早，但擔心未來對金融機構盈利空間及競爭自由，極可能帶來長久的負面影響。

到北京一趟，响街上無論是衣履商店又或者是消費場所，睇到價錢牌，不期然教筆者感受到內地人民消費力及消費興趣的成長速度，着實驚人，今時今日，到祖國旅遊早不再是慳錢選擇，分分鐘仲比到泰國、日本等旅遊熱點昂貴，尤其係用一條「紅衫魚」，才換到88蚊人仔的當下。

內地消費增長勁

啱啱睇到份研究報告，內容提及統一（00220）年初推出零售價7元人仔的高級即食麵，銷情理想，管理層估計將佔今年即食麵總銷售額的5%。換算差不多8港元一包麵，即使在香港都好難成為主流，但內地消費者卻輕易受落，不禁令史提芬聯想到，在經濟起飛，消費者對更高層次消費品的需求龐大的情況下，內地零售品牌大有進行產品提升，擴大毛利的條件。

吸引力勝康師傅

兩隻內地副食品及飲料生產商，康師傅（00322）股價年內累積升1.27倍，統一更勁，升1.61倍。以市值計，前者1,140億元，是統一的五倍，預測○九年銷售額51.7億美元，等於統一93.7億人民幣的3.77倍左右，如果雙方都有條件把更多的銷售轉化為毛利，那統一估值就有被低估的可能。睇番一○年預期市盈率，康師傅係三十一倍，統一只係20.1倍，鍾情內需股，又嫌康師傅長期溢價太高的話，統一確係值得考慮。