至於香港投資者好熟悉嘅渣打亞洲區行政總裁白承睿（Jaspal），就會加入董事會做執行董事，唔知呢個委任，係咪因為渣打喺印度發預託證券（TDR）已經進行得如火如荼，拉埋印度人Jaspal「入局」，等佢可以直接喺董事局提多啲意見呢？佢哋嘅委任，會喺一月一日正式生效。

白承睿榮升執董

現時渣打執董Gareth Bullock即將退休，四十九歲嘅Jaspal就頂佢個位，負責亞洲地區嘅增長同管治工作。佢仲同太子講，話可以喺集團董事局中代表亞洲嘅視野及目標，實在感到非常之驕傲咁話喎。事實上，Jaspal仲係繼前主席戴維思之後，第二個駐香港代表入董事局。太子覺得，香港都可以叨吓光呢！

渣打董事會明年上半年開始，仲會將現有審核同風險委員會嘅工作分開，風險委員會負責監督住風險管理工作，同檢討風險管理架構成效，而審核委員會主力監控渣打嘅財務報告、合規同內部監控環境整體情況，加強企業管治。