過去大半年港股升市,低息及美元持續貶值都幫咗一把,吸引炒家借平錢湧入股市搵快錢,但值得留意嘅係,反映美元兌六種主要貨幣的美匯指數,自四月份開始一直跌多升少,未曾反彈過50日平均線樓上收市,不過上星期五美國公布十一月份就業數據超出預期(其實失業率10%只可算係無咁差)後,美匯指數有止跌反彈迹象,執筆時已連續第五日企穩在10日線的75.3水平樓上,現報76.08。
短期美國有幾個重要經濟數據公布,好似今晚有十一月份零售銷售、商業庫存及十二月份消費信心初值,任何一項超額完成,都可能觸發市場對美國經濟復甦的憧憬,刺激美元反彈,不利股市,故此臨近年尾,看官們倒不如提早收爐,或者大大聲細細注玩吓就算。
粵海投資(00270)股東會剛通過向母公司收購惠來電廠25%股權。消息透露,該電廠今年首八個月賺1.3億元人民幣,已預備第二期擴建工程,三年後發電量會增加2.7倍,至3,200兆瓦。
是次惠來電廠的投資額大約為6億元人民幣,暫時每年攤佔回報不過數千萬元,對本身每年盈利超過20億元的粵投來說,新電廠無論在投資及短期回報能力方面,都只係小投資。反而近期廣東幫另一老牌紅籌越秀投資(00123)重組,令人對這些擁有豐厚資產的老牌中資企業充滿憧憬。
憧憬重組體現價值
粵投本身業務範疇廣泛,由東江水供水生意、收費公路項目、物業及電廠投資,到酒店經營都有沾手,如果能夠好好掌握市場「興趣」,向母公司收購注資進行重組,應是大有可為。可惜上半年,遇上豬流感及高燃煤價格,酒店及電廠投資仲係流血當中,或多或少影響盛傳已久、分拆上市的時間表。
水務生意是粵投暫時的主力收益來源,內地缺水及有意透過引入價格市場化,改善浪費情況,水價有上調潛力,估計今、明兩年粵投純利21.1億元及23.2億元,一○年市盈率11.7倍,論估值比本地公用股更低。再者,電廠、酒店業務雖處行業周期谷底,但最壞時刻過咗,未來有望帶動整體業績,甚至分拆上市,把投資者忽視的潛在價值,一次過釋放出來。