針對中資股，內需股喺政策支持下，估值將繼續企在高水平；金融及地產股穩中有升；而上升潛力較大嘅，應該係新興嘅環保概念板塊。

本周初，國務院副總理李克強考察中國環保科學研究院，期間強調要進一步加強生態環境保護建設，大力發展環保產業，促進經濟發展方式加快轉變，提高經濟發展嘅穩定性、協調性和可持續性，再次凸顯中央政府對環保產業嘅支持。

調整持倉揸重環保股

近年不少上市公司因應國策，大搞環保事業，比亞迪（01211）憑着環保汽車概念，榮登汽車股「股王」寶座；仲有被借殼上市、轉型太陽能光伏業務嘅紅發（00566），股價飛升，都係好例子。喺新股之中，昨日掛牌嘅龍源電力（00916），收報8.93元，較招股價升9.4%，長線有可為，可睇位收集。

阿莊近日調整持倉，套現一筆現金，正打算運用其中50萬元，投資環保股，作為明年嘅核心持股之一，初步已選定上月下旬本欄推介過嘅環保電力股──中電新能源（00735），昨日先下首注，以0.6元買入50萬股。

此外，唔知大家覺唔覺，今年紅籌股表現甚佳，如老牌紅籌北京控股（00392）、上海實業（00363）、越秀投資（00123），股價表現贏得股東歡心。查實喺紅籌股之中，仍不乏落後者，早前阿莊推介嘅啤酒股金威啤酒（00124）係其一，另一隻就係香港中旅（00308）。

阿莊亦曾分析過，今年以來中旅股價明顯跑輸大市，主要係資產回報不理想，有必要加快資產重組，提升資本回報率和盈利能力。直至上月底，市場久候嘅注資行動終成事實，中旅斥資逾2億元收購母公司嘅旅遊資產，股價打破悶局，一度飆上2.47元，昨日收報2.2元。

明年內地將致力刺激居民消費，推動內需，旅遊休閒消費市場發展潛力龐大。以中旅嘅股東背景及業務定位，未來喺發展中國旅遊市場嘅空間廣闊，若然來年公司繼續加快推動資產重組，包括落實分拆業務上市，將有助釋放資產價值，趁近期市況調整，可留意喺2元邊上車嘅機會。