香港中資證券業協會正式成立，尋日好隆重搞酒會，全港證券界名人幾乎到齊，港交所（00388）候任行政總裁李小加仲上台演講，喺咁多個嘉賓之中，佢特別受注目，皆因佢好激動。
李小加話中資證券業協會嘅成立令到自己「生於大陸，長於大陸」嘅香港人，零舍自豪同高興，佢話咁係象徵中國嘅實力同香港嘅開放。
希望港券商北上
李小加仲話希望中資企業日後可以好似港交所咁開放，敢起用大陸人做重要角色，而中資公司就敢用港人同善用港人，仲話家陣中資大舉南下，亦希望港資券商可以北上。睇嚟李小加真係好感觸，佢咁多年喺香港嘅奮鬥背後，唔多唔少要身經百戰。
佢演講完就即刻走人，原來要趕去台灣搞兩地發行ETF同窩輪。