扮聖誕老人爆驚喜

呢個提早慶祝嘅聖誕派對，係上月花旗全球義工日嘅延續。話說花旗集團環球金融交易服務亞太區主管Anthony Nappi，同私人銀行亞太區行政總裁Aamir Rahim上月去完幼兒園探訪後，應承咗班小朋友會再嚟，大人講嘢點可以唔算數呢？所以佢哋兩個就再次探訪，仲加埋香港區資本市場及企業銀行業務總裁麥永森！

小朋友當然期待佢哋再嚟，但係估唔到Anthony咁鬼馬，扮成聖誕老人出現，搞到成班小朋友即刻尖叫，個個都撲埋去聖誕老人要抱抱同埋攞禮物。