本文重點
本周一阿莊推介嘅越秀投資（00123），走勢相當對辦，昨日報2.57元，升4.9%，成交多達8.86億元，有上車者，可以穩坐釣魚船。中國玉米油（01006）招股，反應如何尚有待觀察，但阿莊上周五見報推介嘅中國食品（00506）表現就唔錯，昨日收報7.47元，升2.6%，料快見目標價8元。
細價股熱炒，早前阿莊提及嘅信佳國際（00912），昨日宣布中期業績，截至九月底止，中期收入4.82億元，同比增長17.8%；純利2,510萬元，增長91%；每股盈利10.81仙，中期息每股4仙。公司半年純利已超過去年度純利，難怪昨午業績一出，股價即時飆升，曾見1.34元，收報1.23元，升28%，成交1,589萬元。
信佳現價仍便宜
信佳預期，部分產品如電子車票票務器、專業音響器材及互動教學產品等將可維持增長勢頭，並期望喺客戶開始補充存貨下，將獲得更多定單。保守假設下半年表現與上半年相若，則現價預測市盈率僅5.6倍，息率逾6厘，點計都仲係好平，合理價至少值1.8元。
繼續聚焦二、三線股，中國稀土（00769）股價喺1.6至1.7元水平已橫行咗三個多月，睇其業務發展趨勢，唔怕佢唔行，阿莊正睇位入市。
早前，中國稀土落實以約2億元人民幣投資高端液晶顯示器拋光粉生產線。由於目前中國市場上這類產品全由海外進口，新產品推出後將可滿足內地市場嘅龐大需求，即係話唔憂賣。待整個發展項目完成後，公司嘅拋光粉年產能將提升至2,000噸，明年起逐步投產，勢成為公司盈利新增長點。
另外，今年第三季耐火材料市場開始回暖，公司嘅鎂砂業務直接受惠，旗下已竣工嘅高純鎂砂首期生產線已投入試產，明年將全面體現投資效益。
今年以來，內地有關部門一再強調，要加大對稀土資源嘅保護力度，早前由江銅集團出手，與四川礦投聯手發展全球第二大稀土資源地──四川冕寧縣牛坪稀土礦，便屬一例。國家不讓稀土資源賤價出售，稀土行業變相獲政策保障，若明年稀土價格如期走高，類似中國稀土這類股份，估值極具上調空間。
再看該股喺今年七月才以每股1.5元嘅作價配股集資1.95億元，向下有位睇，現水平具值博率。